Kristilega skólahreyfingin var stofnuð 27. janúar 1979 af Kristilegum skólasamtökum (KSS), Kristilegu stúdentafélagi (KSF) og Styrktarfélagi Kristilegu skólahreyfingarinnar (SKS stofnað 20. janúar sama ár en nú aflagt). Markmið KSH er að sameina kristna nemendur og stúdenta á Íslandi og breiða út fagnaðarerindið um Jesú Krist. Að þessum markmiðum hefur verið stefnt með því að styðja við starf aðildarfélaganna KSS og KSF og vinna að útbreiðslu kristinnar trúar og kristilegs skólastarfs um landið. Í gegnum tíðina hefur KSH átt í nánu og farsælu samstarfi við KFUM og KFUK og Samband íslenskra kristniboðsfélaga.   

Stjórn KSH er kosin á árlegu ársþingi hreyfingarinnar og hefur m.a. að hlutverki að fylgjast með starfi aðildarfélaganna og bera ábyrgð á starfsmannamálum. Undanfarin ár hefur hreyfingin verið með starfsmann í hálfu starfi en launakostnaður er fjármagnaður með gjöfum einstaklinga og öðrum styrkjum s.s. frá Kirkjumálasjóði og prófastsdæmum.

Núverandi starfmaður KSH er sr. Ólafur Jón Magnússon skólaprestur og hefur hann aðsetur á skrifstofu Sambands íslenskra kristniboðsfélaga, Háaleitisbraut 58-60 (2.hæð), 108 Reykjavík. 

KSH hefur frá stofnun (KSF gekk í IFES 1975) verið aðili að IFES (International Fellowship of Evangelical Students) sem eru alþjóðleg samtök kristilegra skólahreyfinga. Innan IFES eru meira en 500.000 stúdentar í yfir 160 löndum.

 

Aðildarfélög:

Kristileg skólasamtök – KSS

Kristileg skólasamtök, KSS, voru stofnuð 22. janúar 1946 og er félag fyrir ungt fólk á aldrinum 15-20 ára. Félagsmenn halda fundi á laugardagskvöldum kl. 20:30 að Holtavegi 28, húsi KFUM & KFUK, í Reykjavík. Félagið vinnur að eflingu og útbreiðslu kristinnar trúar meðal nemenda í 10.bekk grunnskóla og samræmdum framhaldsskóla. 

Heimasíða KSS
KSS á Facebook
Instagram: stjornkss

Kristilegt stúdentafélag – KSF

Kristilegt stúdentafélag, KSF, var stofnað 17. júní 1936 og starfar innan Þjóðkirkjunnar og Háskóla Íslands. Markmið félagsins er að sameina trúaða stúdenta og aðra á aldrinum 20-30 ára til þess að styrkja og glæða trúarlíf þeirra og boða fagnaðarerindið um Jesú Krist. Félagið er með fundi annan hvern fimmtudag kl. 20:00 í Kristniboðssalnum, Háaleitisbraut 58-60

Heimasíða KSF
KSF á Facebook